எத்தனிப்பு

எத்தனிப்பு

நிதர்சனமான எத்தனிப்புகள்
உயிரின் பதிவுகளாகத் திசைதடுமாறிப்
பதைத்துத் திகைத்து உருண்டு புரண்டதில்
பாகாய் உருகிய துப்பல்களும்
அதன் அதீதங்களும் நீர்க்குமிழ்களாக - அதை
மைக்ரோ வினாடிகளில் பழங்கதையாக்கியது
விம்மி விம்மி நொதித்த மனம்
தகிக்க முடியாத பிதற்றல்கள் மரணித்திருப்பதாய்
சட்டென்று தணிந்து சாமரம் வீசிட
நந்தவனப் பூக்கள் திறந்து
செந்தேன் அமுதம் சொட்டி
துளித்துளியாக விவரிக்கிறது - தன்
சாதாரண நிமிடங்களின் அந்தரங்கத்தை......