உன்னோடு …

வாழ்க்கையில் குதூகலம் கொட்டிக் கிடக்கிறது .

நமக்கான இடம் இங்கு காலியாக இருக்கிறது .

இந்த வானம் – இந்த பூமி எல்லாம்

நம்மைக் கௌரவப்படுத்தும் ஏற்பாடுகள் .

என் விழகளைப் பார்த்து நீ விவரம் அறியும்

நம் உடன்பாடுகள் .

உன் செல்லக் கோபத்திற்காக என் குறும்புகள் செய்யும்

சின்னஞ்சிறு முரண்பாடுகள் .

நீ என்னோடு கலந்த நேரம் கூட தாமதம் என்று

என் நெஞ்சம் சொல்கிறது .

இருந்தாலும் உனக்கும் – எனக்கும்

இந்த ஒரு பிறவியே போதுமென்கிறது .

அந்த நந்தவனச் சாலையோரம் நாமிருவரும்

நடந்து போகிறோம் .

இருவர் வெப்பமும் இடம் மாறிக் கொள்ள சாரல்கள்

சடைசடையாய் பொழிகின்றன .

உன் பிஞ்சு விரல் என் முகம் தொட்டுத் தலை துவட்டுகிறது .

உடம்பெல்லாம் குளிர் .

உயிரின் ஒவ்வொரு அணுவிலும் ஈரம் .

அதோடு நீ கொடுக்கும் அர்த்தமுள்ள ஒரு முத்தம் .

உன் இதழ்கள் நடுங்க

சுவாசம் கூட சப்தமிடுகிறது .

கண்கள் மூடி மூடி

ஏதேதோ பேசுகிறது .

எனக்கும் அப்படி தான்.

முடிந்த வரை நான் அதை மூடி மறைக்கப் பார்க்கிறேன் .

தூரத்துப் பறவைகள் பேசிக் கொண்டு பறப்பது

நம்மைப் பற்றியாகத் தான் இருக்கும் என்ற நினைப்பு நாமிருவருக்கும் .

பாதையில் மழைத்துளிகள்

பாம்புக் குட்டிகள் போல ஓடிக் கொண்டிருக்கின்றன.

துள்ளிக் குதித்துக் கால்கள் நனைத்து

என்னை நோக்கி நீ கையசைக்கிறாய் !

மீண்டும் நாம் குழந்தைகளாகிறோம் .

தங்கக் காசுகளைப் போல

சூரியத் தாரையில் உன் முகம் ஜொலிக்கின்றன .

தண்ணீரின் ஒவ்வொரு சொட்டிலும் அது

பட்டுத் மிதக்கின்றன .

வானத்தில் ஏதோ ஒரு மேகம்

சப்தமிட்டு வாழ்த்துச் சொல்லி தூறலைத் தொடர்கிறது .

“எதாவது பேசு”  என்று நீ கேட்பதற்கு முன்னால்

ஏதோ ஒன்றை பற்றி முடிவில்லாமல் பேசிக்கொண்டியிருக்கிறேன் .

காலம் நம்மைத் தடை செய்யாமல் இருப்பதால்

உன்னோடு இருக்கும் இந்த ஒவ்வொரு பொழுதும்

அழகாய் இருக்கின்றது .

இந்த நேரத்தில்

நீ சூடிக் கொள்வதற்காக மலர்கள்

என்னை அழைப்பதாய் சொல்கிறேன் .

நீயும் புன்னைத்து ‘ம்’ என்று சொல்கிறாய் .

பதியமிட்டிருந்த பூச்செடியை வேரோடு எடுத்து

உனக்குப் பரிசளிக்கின்றேன் .

வாய்விட்டு நீ சிரிக்கின்றாய் .

அங்கிருந்த அனைத்து மொட்டுகளும்

மலர்ந்தும் மலராமல் என்னை அழைக்கின்றன .

நீ ‘ம்’ என்று சொல்லி விட்டால்

நீ இருக்கும் இடமெல்லாம் பூ வாசம் தான் .

அந்த வேளையில் நீ இன்னும்

நனைந்து கொண்டு இருக்கிறாய் .

தண்ணீர் சொட்டுகிறது .

இன்னும் மழைத் தூறக் கொண்டே இருக்கிறது .  

 - சந்திரபால்.