உற்றுப் பாருங்கள்

[வினோதினி என்ற பெண்ணுக்கு ஆஸிட் ஊற்றப்பட்டு இறந்தவுடன் அடுத்த மாதமே வித்யா என்ற ஒரு பெண்ணும் ஆஸிட் வீச்சில் இறந்தார். அச்சமயத்தில் நான் எழுதிய கவிதை இது .  இனி அந்தக் கொடுமை நடக்க கூடாது . இந்தக் கவிதையை அதற்காக இன்னொரு முறை படித்துப் பாருங்கள் .] 

 

ஆஸிட் வேண்டுமா

ஆளுக்கு ஒரு கப் ஆஸிட் வாங்கிக் கொல்லுங்கள் .

முகம் வெந்து சதை ஒழுகிப் போன வினோதினிகள்

ஒவ்வொரு நாளும் கதறுகின்றன .

பெற்றவர்களை - உடன் பிறந்தவர்களை

ஞாபகங்கக் கிடங்குகளில் அடைத்து துன்புறுத்துகின்றன .

கொஞ்சி முத்தமிட்டு நடைபழக்கிப்

பார்த்து பார்த்து வளர்த்த முகமும்

கடைசியாகப் பார்த்த முகமும்

நினைவுகளில் விஷம் தடவிக் கொல்லுகின்றன .

“அட போங்கப்பா

யாருக்கு நாங்க என்ன செஞ்சோம் ….!

கோயில் கொளம் எல்லாம் எதுக்குப்பா….?

இப்ப அவனுக்கு சந்தோஷமா ….!

அவனுக்கு ,

மணியடிச்சா மூனு நேரமும் சோறு கெடைக்கும் !

நாங்க எப்படிபா வாழ்றது” ..?

எத்தனை கனவுகள் …

பிழைத்தும் என்ன செய்ய முடியும் ..?

சாகும் வரை சாவுதான் ….

முன் ஜென்மத்தில்

நம்பிக்கை வைத்து தேற்றிக் கொள்வதா …!

நீங்கள் அதை பற்றியெல்லாம் கவலைப்படாதீர்கள் !

ஆளுக்கு ஒரு கப்

ஆஸிட் வாங்கிக் கொல்லுங்கள் .

உங்களுக்கு யாரைப் பிடிக்க வில்லையோ

அவர்களின் முகத்தில் ஊற்றுங்கள்

முடியவில்லையென்றால்,

வித்யாவுக்கு ஊற்றியது போல

முதுகில் ஊற்றுங்கள்

ஆஸிட்டில் நனைந்த உடலை

கிருமிகள் மெல்லும் .

சதைகள் கரைந்து கருப்பு ரத்தமாக வடியும்

மரணத்தின் கதவுகள் திறந்து

இந்த சமுதாயமே சேர்ந்து

புடனி பிடித்து்தள்ளும் போது

என்ன செய்ய முடியும் …!

அப்படியென்ன உணர்ச்சி…?

அப்படியென்ன காதல் …?

அவர்கள் சேர்ந்திருந்தாலும்

இதுதான் நடந்திருக்கும் .

ஆஸிட்டில் வெந்து போன வினோதியின் தந்தை

வித்யாவுக்கு வைத்தியச் செலவு பார்த்ததெல்லாம்

சாதாரணமானதல்ல .

உங்களுக்கு எதுக்கு இதெல்லாம் !

ஆளுக்கு ஒரு கப்

ஆஸிட் வாங்கிக் கொல்லுங்கள் .

உங்களுக்கு

மரண தண்டனை – சித்திரவதையெல்லாம் இல்லை .

காதல் திருமணங்கள் பற்றிப் பேசுபவர்கள்

உங்களால் மேடையில் பிரமாதமாகப் பேசுவார்கள் .

ஆமாம் சொல்ல மறந்து விட்டேன் .

எதற்காக

பேப்பரில் – டீவியில்

பார்த்துத் தெரிந்து கொள்ள வேண்டும் …!

வீட்டில் அக்கா , தங்கை இருந்தால்

அவர்கள் முகத்தில் ஊற்றிப்

பக்கத்திலிருந்தே பாருங்கள் .

இன்னும் நீங்கள்

திடமானவர்கள் என்றால் ,

வினோதினியின் குடும்பத்தோடும்

வித்யாவின் குடும்பத்தோடும்

ஒரு நாளு முழுக்க தங்கிருந்து பின் வாருங்கள் .

அதன் பிறகு

ஆளுக்கு ஒரு கப்

ஆஸிட்டு  வாங்குங்கள்

வாங்கினால் ,

உங்கள் முகத்தில் நீங்களே ஊற்றித்

தினமும் உற்றுப் பாருங்கள் .

-சந்திரபால் .